Al-shabaab Oo Baaq U Dirtay Taageerayaasheeda Ku Sugan Yurub Iyo DigniintaAy USoo Jeedisay Faransiiska

Xarakada Al-shabaab ee ka dagaalanta Soomaaliya ayaa taageerayaasheeda ku sugan Qaaradda Yurub ugu baaqday inay ku day-daydaan labadii wiil ee tododbaad ka hor weeraray wargeyska Charlie Hebdo ee Paris kasoo baxa, kaasoo lagu soo daabacay sawirro af-lagaado ku ah Nabigeenna Muxamed (NNKH).
Al-shabaab ayaa weerarkii wargeyska Charlie Hebdo ku tilmaantay howlgal geesinimo ah, laguna qaaday dad gaalo ah oo gabood-fal ku kacay, uuna weerarkaas dowladda France u ahaa digniin weyn.
“Waxaan uga digaynaa dowladda Faransiiska iyo kuwa kale ee ku lugta leh dhibaateynta Muslimiinta inay la kulmi doonaan wixii ka dhacay Paris,” ayaa lagu yidhi hadal ay soo saartay Al-shabaab.
Sidoo kale, Al-shabaab ayaa sheegtay in weerarkii Paris ee lagu dilay 17-ka qof uu yahay mid ku dayasho mudan; kuwaasoo intooda badan ahaa qaar ka mid ah wariyeyaashii ka howlgalayay wargeyska Charlie Hebdo.

 “Howlgalkaas waxaan uga mahadcelinaynaa walaalaheenna Al-Qaacida ee ka dagaalama Jasiiradda Carabta, waxaana u sheegaynaa inuu yahay mid fiican oo ku dayasho mudane, iyaguna ay sii wadaan howlgalladaas oo kale,” ayay mar kale tidhi Al-shabab.

Al-shabaab ayaa weli gacanta ku haysa deegaanno u badan miyi oo Soomaaliya ku yaalla, iyadoo la sheegay in labadii nin ee howlgalkii magaalada Paris fuliyay oo ka tirsnaa ururka Al-Qaacida Jasiirada Carabta ay tababar ku qaateen Soomaaliya.
Ugu dambeyn, waxaa la sheegay in Maxamed Geelle oo sannadkii 2010-kii ku weeraray xarunta Denmark ee Copenhagen uu ka tirsanaa Al-shabaab, isagoo weeraray nin sawiray kartoon uu ku afla-gaadeeyay Nebi Muxamed NNKH.