Turey {AN}–Magaalada Istanbul ee dalka Turkiga, ayaa waxaa maanta lagu aasay qaar ka mid ah dadkii lagu dilay afgambigii fashilmay, ee habeenkii Jimcaha ka dhacay dalkaasi.
Madaxweynaha Turkiga, Recep Tayyip Erdogan, ayaa ka qaybgalay Salaaddii Janaasada oo dadkaasi loogu sameeyay Masaajidka Fatih, iyadoo sidoo kalana uu ka qaybgalay aaskooda.
Madaxweynaha oo dadka kula hadlaayay Masaajidkan, ayaa ka tacsiyadeeyay geerida dadkaan, waxaana uu tacsi u diray qoysaskii iyo qaraabadii ay ka baxeen.
Sidoo kale waxaa uu ballanqaaday inay soo qab qabanayaan kuwii soo maleygay afgambigan oo qalqal-geliyay dalkaasi, isla-markaana ay horkeeni doonaan cadaaladda, si sharciga loogu qaado.
Shacabka Turkiga, ayaa lahaa sababtii ugu weyneyd ee lagu fashiliyay afgambigaasi, ka dib markii ay isugu soo baxeen wadooyinka magaalooyinkaasi dalkaasi, iyadoona la arkaayay iyagoo gacmaha ula tegaaya Ciidamadii Militariga ee ku dhawaaqay inay la wareegeen taladii dalka.
