Puntland : Khasaaraha Dagaal Lagu Hoobtay Oo Maalintii Labaad Ka Socda Buuralayda Gal-gala

Garowe (AN) Dagaal xoogan, ayaa maalintii labaad la soo sheegayaa in Buuraleyda Galgala uu ku dhex maraayo Ciidamada Maamulka Puntland iyo dagaal-yahanada Ururka Al Shabaab.

Ciidamada Puntland, ayaa waxay xoogga saarayaan sidii ay Shabaabka kaga saari lahaayeen Buuraha deegaanada Calmadow iyo Karin Xagar-wade, ka dib markii la sheegay in ay isku ballaadhiyeen deegaanadaasi.

Ciidamada Puntland oo wata dabaabaadka dagaalka, ayaa iska caabin xoogan kala kulmaaya mintidiinta Ururka Al Shabaab, kuwaa oo la tilmaamay inay qorsheynayaan inay isku ballaadhiyaan Buuraha dhidhidhsan ee Golis.

Inkastoo ay adag tahay in macluumaad rasmi ah laga helo khasaaraha uu geysanaayo dagaalka, ayaa waxaa hadana la soo sheegayaa in uu jiro khasaare labada dhinacba ka soo kala gaadhay dagaalka.

Ilaa 5 askari oo ka mid ah Ciidamada Maamul Goboleedka Puntland, ayaa waxaa dhaawacyadoodu la dhigay Isbitaalka Bandar Qaasim ee Magaalada Boosaaso.

Saraakiisha Ciidamada Puntland iyo Ururka mayalka adag ee Al Shabaab, ayaan iyagu wax war ah ka soo saarin dagaalka ka sii soconaaya Buuraha Galgala.