Hargeysa (AN) Gudoomiyaha Xisbiga Waddani Cabdiraxmaan Cirro, ayaa si qalbi furan xisbiga waddani ugusoo dhaweeyay Xildhibaan Cabdiqaadir Jirde iyo Taageerayaashiisa oo ku dhawaaqay inay Waddani ku biirayaan.
“Xildhibaan C/Qaadir Jirde aad ayaan ugu faraxsanahay inuu kusoo biiray Xisbiga Waddani, si diiranna waan ugu soo dhoweynayaa Xisbiga isaga, masuuliyiinta kale & dhamaan taageerayaashooda ballaadhan.
Xildhibaan Cabdiqaadir waa ruug caddaa siyaasiya kana mid ah haldoorka ay Somaliland ku faanto ee dhidibada dawladnimo taagay, soona gaadhsiiyay halkay maanta marayso.
Dhamaan Taageerayaasha WADDANI waxay diyaar u yihiin soodhoweyntiisa.
Waxaan u-mahadcelinayaa dhamaan madaxda iyo taageerayaasha Xisbiga Waddani ee UK ee dedaalka badan muujiyay” ayuu Gudoomiye Cirro ku yidhi Qoraal uu soo saaray.
Xildhibaan Cabdiqaadir Jirde iyo Jaaliyad ka soo jeeda Maroodijeex iyo Hawd ayaa dhawaam munaasibad ay London ku qabteen ku sheegay inay Waddani ku biirayaan, iyadoo munaasibadoodana laga qabanqaabinayo Hargysa.
