“Waxaanu Rajeynaynaa In Sanadka 2015-ku Noqdo Sanad Horumar Badan Laga Samayn Doono Wada Hadalada”. Xasan Sheekh Maxamuud

Madaxwaynaha Soomaaliya, Xasan Sheekh Maxamuud oo doraad dib ugu laabtay Magaalada Muqdisho, ka dib wadahadalladii Jabuuti ku dhex maray dhiggiisa Somaliland, ayaa shacabkiisa uga waramay waxyaabo ka duwan qodobbadii ka soo baxay wadahadallada, waxaanu sheegay in sanadka 2015-ka oo bilowgooda loo ballamay wejiga labaad ee wada hadalladaasi uu noqon doono sanad horumar laga gaadho qorshahiisa midnimo doon.

Xasan Sheekh oo saxaafadda kula hadlay Madaarka diyaaradaha ee Muqdisho, ayaa isaga oo ugu horeyn ka hadlaya safarkiisa Jabuuti yidhi “Waxaanu booqasho gaaban ku tagnay dalka Jabuuti, oo aanu kula soo kulanay wefti ka socday Somaliland oo uu hoggaaminayey Madaxwayne Siilaanyo, wada hadalladii Somaliland iyo Soomaaliya ayuun baa halkoodii laga sii ambo qaadey, bayaan dhowr qodob ka kooban ayaanu soo saarnay, hoosna waanu uga wada hadalley ammuurahaasi, horumar aad u wanaagsan oo la taaban karana wuu ka dhacay, isfahamkii labada dhinac ee muddada soo socdayna meel ayay soo gaadheen hadda, wayna sii socon doonaan haddii ILAAHAY yidhaahdo. Waxyaabaha ugu muhiimsan (ee ka soo baxay) waxa weeyaan in wadahallada la sii dardar-geliyo, laguna dhiirado arrimaha Masiiriga ah ee u dhexeeya labada dhinac, kana hadlaya Masiirka guud ahaan Soomaaliya iyo sidii ummada Soomaaliyeed ee dalka deggani iskula wada jaan-qaadi lahaayeen, wixii tabasho ah ama dhibaatooyin ah ee jirana looga wada hadli lahaa, si labada dhinac raali ku yihiin oo maslaxadda ummadu ku jirtana loo gaadhi lahaa”

Madaxwaynaha Soomaaliya oo sii hadlaya ayaa sheegay “Waxaanu ku heshiinay In bisha labaad ee sanadka 2015-kana Magaalada Istanbul ee dalka Turkiga oo wada hadallada Soomaalidu ka socon jireenna in dib la iskugu noqdo oo wadahadallada halkooda laga sii wado, ayaanu ku ballanay. Markaa sanadka cusub ee 2015-ka waxaanu rajeynaynaa inuu noqdo sanad horumar uu dalka Soomaaliya gaadho  guud ahaan, gaar ahaanna arrinta midnimada horumar badan laga samayn doono, haddii ILAAHAY yidhaahdo…”ayuu yidhi.