Wefti ka socda xukuumadda Somaliland, ayaa shalay gaadhay Magaalada Borama ee xarunta Gobolka Awdal, kuwaasi oo la filayo inay halkaasi u tageen xaalad amaan daro

Borama (AN)  wefti ka socda xukuumadda Somaliland, ayaa shalay gaadhay Magaalada Borama ee xarunta Gobolka Awdal, kuwaasi oo la filayo inay halkaasi u tageen xaalad amaan daro oo laga cabsi qabo inuu halkaasi ka abuuro Suldaanka beesha Jibriil Yoonis (Samaroon) oo maalmihii u dambeeyay ku dhuumaalaysanayey buuralayda gobolkaasi.

Weftigan oo uu Madaxwaynaha Somaliland u diray Gobolka Awdal ayaa waxa hoggaaminaya Wasiirka wasaaradda wasaaradda Gaashaandhigga, Axmed Xaaji Cali Cadami, waxaana xubno ka ah wasiirka xidhiidhka Golayaasha iyo wasiirro kale.
Cali Xaamu Jibriil, Wasiirka xidhiidhka Golayaasha, Tiknoolajiyadda iyo cilm-baadhista Somaliland, oo xalay khadka Telefoonka ugu waramay Wargeyska Somalilandtoday ayaa sheegay ujeeddada weftigoodu tahay inay soo indho indheeyaan xaaladda guud ee gobolka Awdal.

Wasiiruku wuxuu sheegay in aanay jirin xaalad cabsi leh oo xukuumaddu u dirtay weftigooda, maadaama buu yidhi hadalkii ka soo yeedhay Suldaanka Beesha Jibriil Yoonis aanay cidna kula socon ee uu yahay wax uun ku kooban yahay Suldaanka oo kaliya.

Wasiirka oo faahfaahinaya ujeeddada weftigooda ayaa yidhi “Waxaan ka mid ahay wefti xukuumaddu u dirtay Magaalada Borama ee Gobolka Awdal, waxaana weftiga hoggaaminaya Wasiir Cadami. Ujeeddada weftiguna waa inaanu xaaladda guud ee gobolka Indho-indheynno iyo amniga”

Wasiir Cali Xaamud Jibriil, oo la waydiiyey in qorshaha weftigooda ay ka mid tahay inay la xaajoodaan Madax-dhaqameedka beesha uu ka soo jeedo Suldaan Abubakar oo dhaqdhaqaaqyo amaanka lagu waxyeelanayo ka bilaabay buuralayda gobolka awdal, ayaa sheegay in aanay jirin wax baqin ah oo arrintaasi ay xukuumaddu ka qabto “Wax xukuumaddu khatar u arkayso iyo wax baqin ahi oo arrintaa laga laga qabaa ma jirto” ayuu yidhi, Wasiir Cali Xaamud Jibriil, waxaanu intaasi ku daray “Suldaanka hadlayna cid reerka uu ka dhashay waxan kulama socdaan, sidaa dadku u maqlay ayuun bay suuqa ugu jirtay, markaa wax khatar ah oo aanu u nimid gobolka ma jirto”

Dhanka kale, ilo-wareedyo xog-ogaal ah ayaa sheegay in weftigan uu Madaxwaynuhu u diray Magaalada Borama la doonayo inay wada hadal la bilaabaan Madax-dhaqameedka Gobolka Awdal, si markaasi ka dib waxgaradka iyo Madax-dhaqameedku ay nabadgalyo ku qanciyaan Suldaan Abuubakar. Inkasta oo uu wararkii u dambeeyay ee ka imanaya gobolka Awdal ay sheegayaan in xukuumaddu deegaannada Qolujeed iyo deegaannada lagu tuhmayo in Suldaankaasi joogo la geeyay ciidamo dheeraad ah oo xoojinaya ciidamada qaranka ee hore halkaasi u sii joogay