Wasiirka Wasaaradda Macdanta iyo Tamarta Md. Xuseen Cabdi Ducaale iyo hawlwadeennada wasaaraddiisa ayaa ololaha nadaafadeed ka fuliyay inta u dhexaysa garoonka kubbadda cagta iyo xaafadda Siinaay ee degmada Axmed-Dhagax.
Wasiir Ducaale oo intii uu hawlgalkan nadaafaddu socday la hadlay Warbaahinta ayaa ku nuuxnuuxsaday muhiimadda ay nadaafaddu u leedahay mujtamaca iyo sida loogu baahan yahay in ilaalinteeda xil la iska wada saaro.
Wasiirku waxa uu ammaan u soo jeediyay cid kasta oo ka qaybgashay hawlgalkan, isaga oo si gaar ah u bogaadiyay hawlwadeennada Wasaaradda Macdanta iyo Tamarta oo si baaxad leh uga qaybqaatay maalinta nadaafadda Qaranka.
Badhasaabka gobolka Maroodijeex, Xoghayaha Gobolka, iyo Guddoomiyaha degmada Axmed-Dhagax ayaa iyaguna si weyn u soo dhoweeyay hawlgalka nadaafadeed ee ay Wasaaradda Tamarta iyo Macdantu ka fulisay xaafadaha degmada Axmed-Dhagax.
Hay’adaha kala duwan ee dawladda Somaliland ayaa maanta isugu soo baxay hawlgalka nadaafadda qaranka, iyada oo laamaha kala duwan ee dawladdu ay hawlgalkaas ka fuliyeen deegaanno kala duwan.
