Golaha Wakiilada Oo Ku Fashilmay Ansixinta Xeerarka Hor-yaalla Iyo Digniinta Guddoomiye CIRRO

Mudaneyaasha Golaha wakiillada Somaliland, ayaa ku fashilmay inay ansixiyaan xeerka Xabsiyada iyo Xeerka Komishanka dib u habaynta shuruucda oo ka soo noqday Golaha guurtida, kuwaas oo golaha wakiiladu ay u ballan sanaayeen inay ansixiyaan labadii maalmood ee u dambeeyey.

Fadhiyadii Golahaasi ee Maanta  iyo Shalay oo loogu ballan sanaa in lagu ansixiyo xeerarkani, ayaa fadhiyadaasi ay u furmi waayeen kooram la’aan, ka dib markii ay ka soo xaadiri waayeen xildhibaanada Golahaasi oo intooda badani ay magaaladda joogaan, waxaanuu guddoomiye C/raxmaan Cirro Xildhibaanada maqan uga digay inay ka maqnaadaan shaqadooda, isla markaana u gudbiyey guddida joogtada ah ee golahaasi magacyada xildhibaanada maqan.

Guddoomiyaha Golaha Wakiillada Somaliland Mudane C/raxmaan Maxamed C/laahi (Cirro) oo la hadlay mudaneyaasha golaha yimid, ayaa ku war geliyey in sabtida uu goluhu fadhiisan doono, halka uu xildhibaanada maqanna sheegay in sharcigu qaban doono.

Guddoomiye Cirro oo arrimahaasi ka hadlaya waxa uu yidhi “Mudaneyaasha Golaha jooga ee aad ayaanu ugu mahad naqaynaa, mudaneyaasha maqanna dhaliisha way leeyihiin oo laba maalmood oo isku xiga ayuu Kooramku buuxsami waayey, waxaanan dadka maqan u gudbin doonaa guddida joogtada ah ee Golaha, waxaana qabanaya sharciga, waxaan soo jeedinayaa inaanu adkayn doono xaadiriska mudaneyaasha, xeerkuna wuu qabanayaa mudaneyaasha maqan oo xeer hoosaadkana waanu qaybinaynaa Insha Allaah, waxaan soo jeedinayaa in fadhiga aynu sabtida ka dhiganno, mudaneyaashana waxaan u soo jeedinayaa inay yimaadaan”

Xoghayaha Golaha Wakiillada Somaliland C/risaaq Siciid Ayaanle oo isaguna ay warbaahintu wax ka waydiisay sababta goluhu lama cisho kooram la’aan ugu furmi waayey, waxaanuu yidhi “Xeerkan Xabsiyada iyo Xeerka Komishanka dib u habaynta shuruucda oo ka soo noqday Golaha guurtida waxa ay hor yaalla golaha oo waxa buuxsami waayey kooramka in la ansixiyo, labadaas cishana kooram la’aan ayey u baaqdeen xeerarkaasi, mudaneyaasha maqanna guddida joogtada ah ayaa loo gudbinayaa