{"id":64998,"date":"2021-08-30T23:35:04","date_gmt":"2021-08-30T23:35:04","guid":{"rendered":"https:\/\/arabsiyonews.com\/?p=64998"},"modified":"2021-08-30T23:35:04","modified_gmt":"2021-08-30T23:35:04","slug":"boodhari-mills-wershad-muddo-la-wada-sugayey-oo-duleedka-hargeysa-laga-daah-furay","status":"publish","type":"post","link":"https:\/\/arabsiyonews.com\/index.php\/2021\/08\/30\/boodhari-mills-wershad-muddo-la-wada-sugayey-oo-duleedka-hargeysa-laga-daah-furay\/","title":{"rendered":"Boodhari Mills: Wershad Muddo la Wada Sugayey oo Duleedka Hargeysa laga Daah-furay"},"content":{"rendered":"

Hargeysa(Arabsiyonews): Xaflad si meeqaam sare ah loo soo agaasimay ayaa maanta lagu daah-furay Wershada daqiiqda ee BOODHARI MILLS (BOODHARI FLOUR). Munaasibadii loo sameeyey ibo-furka Wershada oo lagu qabtay barxada wershada oo ku taala Deegaanka ABAARSO ee duleedka Magaalada Hargeysa,<\/p>\n

\"\" \"\"<\/p>\n

waxa ka soo qeybgalay Madaxweyne Ku-xigeenka Somaliland Md.Cabdiraxmaan Cabdilaahi Ismaaciil (Saylici), Guddoomiyaha Golaha Wakiillada Cabdirisaaq Khaliif Axmed, Qaar Ka mida Saamilleyda Boodhari Mills, Wasiirro, Ganacsato, madax-dhaqameed, Aqoonyahan, Haween, Dhalinyaro iyo marti-sharaf kale oo tirro baddan.<\/p>\n

\"\" \"\" \"\"<\/p>\n

Maamulaha Wershada Daqiiqda ee BOODHARI MILLS Cabdiraxmaan Sheekh Ahmed Nuur oo halkaasi ka hadlay ayaa waxa uu yidhi \u201cInaynu ku salleyno Wershadayn ka kooban bulshada oodhan, oo sided boqol\"\"\u00a0(800) oo reer Somaliland ahi ay soo maalgashadeen,taasi keligeed iskamay iman.<\/p>\n

Maanta Waxaynu haysanaa 32-qof oo wakiillo dunidda dacaladeeda ku kala nool oo ay Somaliland ku jirto, oo qofkasta uu daadkiisi keenay waana Social Capital, ee qof kaliyi ma hir-gelin karo. Waxaan isku maray 11-Waddan iyo 19-Magaalo oo adduunka ka kooban oo si weyn na loogu soo dhaweeyey\u201d.<\/p>\n

\"\"<\/p>\n

Wershadani (BOODHARI MILLS) waxay dabooli doontaa 10% (Boqolkii-ba tobban) daqiiqda dibadda inooga soo degta imika. Waxaanay Boodhari Mills rajeynaysaa 30% ilaa 40% (Boqolkiiba Soddon ilaa Boqolkiiba Afartan) Wejigeedda 2aad iyo Wejigeeda 3aad.<\/p>\n

Markay noqoto meel sugnaanta cuntada dalka, sixir-bararka iyo shaqaalaha-ba ka dawo noqon karta.\"\"<\/p>\n

\u201d \u201cWaxaanu Mallaayiin Dollar ku maal-gelin doonaa, beeralayda dalka, Beeraha waa-weyn ee casriga Adduunka sida loo sameeyo, taana imikaa gacanta lagu hayaa, \u201cHawsha noocan oo kale ahi waa hawl qaran\u201d.Ayuu yidhi Cabdiraxmaan Sheekh. Guddoomiyaha Shirkadda Boodhari MILLS<\/p>\n

\"\"<\/p>\n

Mustafe Ibraahim oo halkaasi ka hadlay ayaa waxa uu yidhi\u201cSaamilleyda shirkaddu 45% (Boqolkiiba shan iyo Afartan) waa Dumar, kharashkii wershada lagu dhisay oodhan waa la bixiyay, wax maanta laynagu leeyahay ama ammaahi ma jirto. Saamilleydayada ka soo jeedda Puntland waanu u mahad-naqaynaa, oo waxaan leeyahay waan idiin soo socdaa\u201d<\/p>\n

\"\"<\/p>\n

Marwo Suhuur Xasan Abiib oo ka mida Saamilleyda Shirkadda Daqiiqda ee Boodhari Mills, ayaa waxay uga mahad-celisay guud ahaan dadweynihii ka soo qeybgalay Xaflada daah-furka Shirkadda Daqiiqda ee Boodhari Mills, waxaanay tidhi \u201cShirkaddan Daqiiqda ee Boodhari Mills waa meel muhiima, waxaanay kaalin weyn ka qaadan doontaa wax soo saarka dalka, shaqo-abuurka, iyo inaynu wax isku darsanno\u201d<\/p>\n

\u201cHablaha waxaan leeyahay haddii wax kale laynoo diiday waa inay beeraha fallano, oo aynu wax soo saarano,isla markaana aynu noqono dad awood leh oo lacag abuura cid kasta way inoo baahan doontaa\u201d. Ayey tidhi Marwo Suhuur Xasan Abiib.<\/p>\n

\"\"<\/p>\n

La-taliyaha Madaxweynaha Dr. Cismaan Sheekh Axmed Nuur,oo halkaasi ka hadlay ayaa bogaadiyay maamulka Shirkadda Daqiiqda ee Boodhari Mills, waxaanu yidhi \u201cGuul ayaad u soo hoyseen waddanka, waa inaynu ka faa\u2019iideysano khayraadka uu ILAAHAY ina siiyay oo aynu wax soo saarno\u201d.<\/p>\n

\"\"<\/p>\n

Marwo Sucaad Carmiye oo halkaasi ka hadashay ayaa waxay tidhi \u201cMaalin kasta intaas oo Million oo Dollar ayaa inagaga baxa, Daqiiq, Sabaayad ayaynu cunaa, Laxoox ayaynu cunna iyo quraac, intuba waxay ka
\nsameysan yihiin daqiiq. Markaa waxaad qabateen Shaqo wanaagsan, waxaanan ka codsanayaa inay dawladuna idin taageerto oo ay cashuurta idinka yareyso\u201d.<\/p>\n

\"\"<\/p>\n

Ergayga wada-hadalada Somaliland iyo Soomaaliya Dr. Edna Aaden Ismaaciil oo halkaasi ka hadashay ayaa waxay tidhi \u201cWixii Wanaagsan ee Somaliland ku soo kordha aad ayay iiga farxiyaan, Somaliland-ta aan rabaa waa taas, aynu dhisanayno, aynu ilaashanayno, aynu fursado u sameynayno shaqaalaha, aynu quruxdda iyo sharafta aynu u yeelayno, oo Somaliland-ta aan jecelahay ee aan rabaa ay tahay\u201d<\/p>\n

\u201cCiddii hindisaha keentay \u201cBoodhari MILLS\u201d, ee hawsha baddan u gashay, in mashruuca intaa leegi uu suuragallo, waxaan ILAAHAY uga baryayaa inuu ka abaal-mariyo,\u201d.Ayey tidhi Marwo Edna Aaden.<\/p>\n

\"\"Wasiirka Wasaaradda Ganacsiga, Wershadaha iyo Dalxiiska ee Somaliland Maxamuud Xasan Sacad (Saajin), oo ka hadlay ibo-furka Wershada Daqiiqda ee Boodhari-Mills,ayaa waxa uu yidhi \u201cWaxaad dadka barteen sidii wax la isugu darsan lahaa, TELESOM waxay ahayd shirkadda kaliya ee maal-gelin shicib ku socotaa,\u2026.waxaan filayaa inay boqolaal noocaas ahi inay yimaadaan. Addunyadaba ogaado Horumarku waxa uu ka bilaabmay markii wax la isu dar-darsaday<\/p>\n

\"\"Guddoomiyaha Golaha Wakiillada Somaliland Md. Cabdirisaaq Khaliif Axmed, oo madashaasi bilnayd ee sida quruxda baddan loo soo agaasimay ka hadlay, waxaanu yidhi\u201cWasaaradda Ganacsiga, Wershadaha iyo Dalxiiska waa inay ku dedaasha sidii ay u difaaci lahayd wax soo saarka dalka. Wax kasta oo ay soo saarno wixii la tartamaya in la saaro cashuur dheeraad ah, haddii kale wax soo saarka gudaheenu hannoqaadi maayo. Waa inaynu mudnaanta siinaa waxaynu soo saarno\u201d.<\/p>\n

\"\" Madaxweyne Kuxigeenka Somaliland Md. Cabdiraxmaan Cabdilaahi Ismaaciil (Saylici oo halkaasi ka hadlay ayaa waxa uu yidhi \u201cWaxa Sharaf weyn oo aad u qiimo baddan ii ah inaan ka soo qeybgalo Xafladan lagu daah-furayo Wershadan aadka u qiimaha baddan leh, ee Boodhari MILLS, waxa aad iyo aad u mahadsan kuwa aan u dhalan Somaliland ee magacii Soomaaliyeed ku aaminay inay ku maal-gashadaan\u201d. Isaga oo hadalkiisa sii watana waxa uu yidhi\u201cReer Somaliland waa waajib saaran inuu qarankiisa maalgashado, waxaan idin leenahay hambalyo intiini dhulka dheer u maray inay hawshaasi hir-gasho\u201d.<\/p>\n